有啲耿耿於懷上個帖我只邀請女藝人發聲，想澄清一點，其實警暴係人性問題，每個人都可以發聲……你，仲想邀請邊個呢? 😏
上集喺度：然後，想就住兩個問題分享下個人想法：
1. 你唔係仲以為好聲好氣同佢哋講有用呀？
2. 點解性別組織唔就警暴發聲？
【你唔係仲以為好聲好氣同佢哋講有用呀？】
1. 我相信有用嘅，只係改變一個人需要時間。我哋回想返14個月前嘅自己，應該會發現自己無論心態、知識同行動上，都改變咗好多。呢個轉變可能正正喺未發聲嘅人身上發生緊，只係可能大家接收嘅資訊唔同、包袱唔同，所以時辰未到。即係咁，王喜當年都係藍絲啦，呢家佢做嘅嘢進取到我會為佢擔心。你話係咪呀哈姆太郎？
2. 吓？14個月都未夠？係呀，我哋要養成每日跑步嘅生活習慣，可能都要一個月以上啦，呢家講緊價值觀喎，可能係由佢阿爺嗰代傳落嚟想要安穩富足嘅價值觀喎。所以社會運動要好多人一齊參與，一人做一啲、輪流做、做好多年，先可以帶嚟改變。
3. 至於好聲好氣有無用，你回想下細個嗰時，你阿媽鬧你定係氹你你會聽佢講多啲？同埋又咁睇，其實鬧佢都未必有用啦。如果兩者都未必有即時效果，我就希望為自己保存一點友善，喺黑暗之中為自己留一點光。即係嬲人其實都好花氣力嘅，然後自己又會generate咗啲bad vibe，（真誠地）對人友善至少自己氣場好啲先。
【點解性別組織唔就警暴發聲？】
首先，性別組織係有就警暴發聲，只係未必夠力量傳到去你度、未必好快，亦未必每次都會發聲。當中有資源問題（好多性別組織只係得1-2個staff，甚至全義工班底），亦有策略上嘅考慮，當然都真係會有諗得太多蠢咗慢咗回應唔切嘅情況。
策略方面當然我絕對唔能夠代表性別組織發言，純粹分享下我自己嘅掙扎同思路：
1. 首先我會諗，對住唔聽民意嘅政府，其實民間小組織出聲明讉責有咩用？就算有十個小組織一齊讉責，其實都係對空氣講嘢。
2. 當然，出聲明可以喚起公眾關注。喂但其實呢，性別組織本身嘅受眾大多係關注人權、公義嘅人，喚起一班本身關注緊事件嘅人關注，作用又有幾大？
3. 咁講即係乜都唔做？唔係啦，我自己就會想花心神去諗其他比表態更有效益嘅出路。例如：吸納同培養多啲人、深化議題討論、提供其他思考角度等等，令社會上有更多人有敏感度同能力為不公義、不平等嘅事發聲。
4. 當前面有一道大家都未攀得過嘅高牆，有人會選擇撞開佢，有人會選擇跳過佢，而我（或部分民間組織）會選擇揼石仔起高個地台、整條梯、同大家一齊練大隻啲，或者斟杯水你飲煮個麵你食。一場運動就係需要有唔同崗位嘅人各施其職，甚至接力，先可以持續。
5. 再延伸一點，其實一場運動除咗正面抵抗／回應打壓，亦都需要建立對未來既想像。我自己成日都會提醒自己，想當年我哋成日回應明光社同roger嘅恐同反同言論，有好大無力感，因為泥漿式嘅討論往往都會有理說不清。再者，後來當佢哋少咗出嚟，我曾經有覺得唔知自己應該要做乜。
6. 情況其實同呢家我哋面對政權打壓先出嚟回應係差不多。被欺壓＞嬲＞回應，一時三刻個動員力一定好強。但呢種動員其實好內耗，好易產生無力感。我覺得我哋需要講我哋想要啲乜（想要一個點樣嘅未來），而唔只係講唔鍾意對方對我哋做啲乜（出聲明回應對方）。資源限制下取捨，我自己傾向做前者，即係第３, 4點講嘅嘢。
7. 當然，返返去一開始，民間組織都一定有做得唔好、做得唔夠嘅哋方。但希望大家記得，其實所謂嘅民間組織，都係由一個個平民組成，只係可能早你幾年關注某個議題。換句話講，其實你覺得有不足嘅地方，你都可以一齊做啲嘢互補。所謂嘅遍地開花，其實係要有好多人一齊種花。一齊種丫~
又寫到好長，多謝你睇到尾，其實重點只有兩個：
1. 改變社會需要嘅時間係要以年計，我哋需要搵一個比較適合自己嘅心態同方法去延續。
2. 每個人都有能力改變社會，而社會大家都有份，所以當過程中覺得其他人做得唔夠，除咗俾建議，都可以試下搵志同道合嘅朋友一齊做啲嘢補返嗰個你認為可以做得更好嘅位，將不滿轉化做改變社會嘅行動，無力感可能會無咁大。
如果喜歡我的分享，like和follow我fb and ig吧！
FB: Mo’s 25°C Journey
IG: cammykwok_mo
25°C Journey 